رووداو - هەولێر : حیزبەکانی کوردستان رازین

حیزبەکانی کوردستان رازین رۆژی لەسێدارەدانی پێشەوا بکرێتە رۆژی شەهیدانی کوردستان

KCK : با کۆنگرەی نەتەوەیی بڕیاری لەسەر بدات

ساکار عەبدوڵڵازادە

رووداو - هەولێر

کۆمەڵێک لە چالاکڤانانی سیاسی کورد لە ئەوروپا، بەمەبەستی دیاریکردنی رۆژی لەسێدارەدانی قازی محەممەد، وەک رۆژی شەهیدانی هەر چوار پارچەی کوردستان، کەمپینێکیان رێکخست.

بڕیاربوو ئەو کەمپینە لە رۆژی لەسێدارەدانی قازی محەممەد، بۆ ماوەی 10 رۆژ بەردەوامبێ و، پاشان داواکە لە نامەیەکدا، بە فەرمی ئاراستەی سەرۆکایەتی هەرێمی کوردستان و پەرلەمان و لایەنە سیاسییەکانی کوردستان بکرێت، بەڵام بەپێی قسەی بەڕێوەبەرانی کەمپینەکە، بەهۆی پێشوازی خەڵک و لایەنە سیاسییەکانی هەر چوارپارچەی کوردستان لەو کەمپەینە، ماوەی چالاکییەکانی درێژکرایەوە.

هەر بە گوتەی، دەستەی بەڕێوەبەری کەمپینەکە، ئەو داواکارییە لەمێژە لەلایەن حیزب و رێکخراوە سیاسییەکانەوە دەخرێتەڕوو و لە دووەمین کۆنفرانسی نەتەوەیی لاوانی کوردستان لە هەولێر لە مانگی رابردوودا، ئەم پرسە خراوەتەوە بەرباس و پێشنیازکرا لە دووتوێی راسپارەکانی کۆنگرەی نەتەوەیی لاواندا رەوانەی کۆنگرەی نەتەوەیی کوردستان بکرێت.

د. سەعدەدین مەلا، ئەندامی لێژنەی پەیوەندییەکانی دەرەوەی ئەنجوومەنی نیشتمانی کورد لە سووریا دەڵێ پێویستە بە زووترین کات ئەو رۆژە بکرێتە رۆژی شەهیدانی کوردستان "چونکە ئەو رۆژە رۆژێکی دیارە و هەموو کوردێک دەزانێ قازی محەممەد کە پێشەوای هەموو کوردە، لەو رۆژەدا لەسێدارەدراوە". 

د.سەعدەددین پشتگیری لە کەمپینەکە کردو، هەروەها رەخنەی لە لایەنە سیاسییەکانی هەرێمی کوردستان گرت، کە زۆر گرنگی بەو بۆنانە نادەن و گوتی "ئێمە خۆمان خاوەندارێتی لە شەهیدانی خۆمان ناکەین و هیچ رۆژێکی نەتەوەیی شەهیدانمان نییە، کە هەموو پارچەکانی کوردستان لە یەک رۆژ و کاتدا یادی شەهیدانی بکاتەوە".

مەسعود تەک، سەرۆکی پارتی سۆسیالیستی کوردستان PSK ، کە پارتێکی باکووری کوردستانە بە (رووداو)ی راگەیاند "لەنێو هەموو کۆمەڵگە و نەتەوەیەکدا هەندێک بەهای هاوبەشی وەک ئاڵا، سروود و رۆژی شەهیدان هەیە، ئەگەر کوردیش پێکەوە ئەو رۆژانە یاد بکاتەوە ئەوە دەبێتە هۆی بەهێزبوونی بیر و هەستی نەتەوەیی لەسەرانسەری کوردستان".

قازی محەممەد، سەرۆکی کۆماری کوردستان لە 31/3/1947 لە گۆڕەپانی چوارچرا لە شاری مەهابادی رۆژهەڵاتی کوردستان لەسێدارەدرا.

بە بڕوای محەممەد ئەحمەد عەلی، سەرۆکی لێژنەی کاروباری شەهیدان و قوربانیانی جینۆساید لە پەرلەمانی کوردستان، نەبوونی رۆژێک بەناوی رۆژی شەهیدان، کەلێنێکە و دەڵێ دەبێ ئەو کەلێنە پڕبکرێتەوە "چونکە ئەو دەسکەوتانەی ئێستا بە خوێنی هەزاران شەهید دروستبووە، پێویستە رۆژیک بۆ شەهیدی کوردستان دیاریبکرێت".

سەرۆکی لێژنەی کاروباری شەهیدان گوتیشی هەر پڕۆژە یاسا یان بڕیارێک بێتە پەرلەمان بۆ دیاریکردنی رۆژی شەهیدانی کوردستان پێشوازی لێدەکەن و لێیدەکۆڵنەوە.

هەندێک لە حیزبە کوردییەکان لەلای خۆیانەوە رۆژێکیان دیاریکردووە، بە ناوی رۆژی شەهیدان، لەوانەش پارتی کرێکارانی کوردستان ، کە هەفتەی شەهیدانی هەیە، هەروەها کۆمەڵە و حیزبی شیوعی ، بەڵام تائێستا قسەیەک لەبارەی رۆژی شەهیدانی کوردستان نەکراوە.

فاروق بابامیری، ئەندامی سەرکردایەتی کۆمەڵەی شۆڕشگێڕی زەحمەتکێشانی کوردستانی ئێران، هیچ گرفتێک لەوەدا نابینێ کە رۆژی لەسێدارەدانی قازی محەممەد بکرێتە رۆژی شەهیدانی کوردستان "قازی محەممەد شەهیدێکی گەورەی مێژووی کوردە لەهەر چوارپارچەی کوردستان"، بەڵام دەڵێت دەبێ رۆژی شەهیدانی حیزبەکانیش بمێنێ "دەکرێ ئێمە رۆژی شەهیدانی کوردستانمان هەبێ و رۆژی شەهیدانی تایبەت بە حیزبەکانیشمان هەبێت، ئەوانە یەکتر رەتناکەنەوە".

هەر لەوبارەوە، مەسعود تەک گوتی "بەهۆی ئەوەی قازی محەمەد یەکەمین سەرۆک کۆماری کوردە و کۆماری کوردستان و کەسایەتی پێشەوا قازی جێگەی رەزامەندی هەموو کوردە، هەر بۆیە باشترین و گونجاوترین رۆژ بۆ دیاریکردنی رۆژی شەهیدانی کوردستان رۆژی لەسێدارەدانی سەرۆک قازی محەممەدە".

بەڵام رۆژ وڵات، ئەندامی لێژنەی پەیوەندییەکانی کۆما جڤاکێن کوردستان KCK، لەبارەی ئەو کەمپینەوە گوتی "ئەوە پێشنیازێکی گرنگە بۆ دروستبوونی یەکێتی لەنێو کورددا، بەڵام بەهۆی ئەوەی پێشنیازەکە کوردستانییە و رووی لە هەر چوارپارچەی کوردستانە، پێویستە کۆنگرەی نەتەوەیی بڕیاری لەسەر بدات".